БИШКЕК, 24-июн. — Sputnik. Алматы — Астана унаа жолундагы кырсыкка кабылган кыргызстандыктарын өздүгү такталды. Бул тууралуу Тышкы иштер министрлиги билдирди.
Алматы шаарындагы КРдин башкы консулдугунун берген маалыматына ылайык, кырсыктан 14 жаштагы эки өспүрүм, 9, 13 жаштагы балдар жана 34 жаштагы бир аял каза болгон.
Көз жумгандардын сөөктөрү 23-июнь күнү Жамбыл районунун Узынагаш айылындагы борбордук оорукананын өлүкканасына жеткирилген.
Ал эми 36 жаштагы айдоочунун абалы оор болгондуктан, Балхаш шаардык ооруканасына жаткырылган.
Эске сала кетсек, буга чейин Балхаш шаардык ооруканасынын директору Sputnik Кыргызстан агенттигине айдоочунун документтерин табууга жардамдашууну суранган.
Кырсык Алматы — Астана унаа жолунун 385-чакырымында, башкача айтканда Алматы, Жамбыл жана Караганда облустарынын чектешкен жеринде болгон. Мында Mercedes Vito микроавтобусу менен Setra үлгүсүндөгү автобус кагышып кеткен.
