БИШКЕК, 15-июн. — Sputnik. Улуттук спорттун түрлөрү боюнча дирекция Көчмөндөр оюндарына катыша турган чет элдик спортчулардын жатагы менен тамак-ашына 48 миллион 300 миң сомдук тендер жарыялады.
Маалыматка караганда чет элден келе турган 2300 спортчунун ар бирине бир күнгө үч миң сомдон бөлүнөт. Алар Ысык-Көлдө 2-9-сентябрь аралыгында, тагыраагы жети күн болушат. Көрсөтүлгөн суммага алардын жатак үйү менен үч маал тамагы кирет.
Улуттук спорттун түрлөрү боюнча дирекциянын сатып алуулар боюнча адиси Жумагүл Сайдилаеванын айтымында, көрсөтүлгөн сумма менен спортчулардын саны өзгөрүп кетиши ыктымал.
"Тендердеги каражат алдын ала болжолдуу эсептелген сумма. Ал өзгөрүп кетиши ыктымал", — деп билдирди Сайдилаева.
Эске салсак, Дүйнөлүк көчмөндөр оюндары 3-9-сентябрь аралыгында Ысык-Көл облусунун Чолпон-Ата шаарында өткөрүлөт.
