БИШКЕК, 12-июн. — Sputnik. Газ ташуучу унаанын жарылышынан жаракат алгандардын төртүнчүсү каза болгонун Травматология жана ортопедия илим изилдөө борборунун башкы дарыгери Алмазбек Кубатбеков билдирди.
Анын айтымында, жабырланган жаран жума күнү каза болгон.
"Анын денесинин 95 пайызы күйүп калган", — деди дарыгер.
Кубатбеков дагы эки бейтаптан абалы оор экенин баса белгиледи.
Эскерте кетсек, 6-июнь күнү газ ташуучу унаа жарылып, андан 10 киши жабыркаган. Күйүп калгандардын алтоо оор абалда №4 оорукананын реанимациясына жаткырылган. Кийин алардын үчөө каза болгон.
Күйүп калгандарга дары-дармектер керектигин Саламаттык сактоо министрлиги маалымдап, кишилерди кан берүүгө да чакырган.
Буга чейин медициналык кароодон өткөн милиция кызматкерлери 20 литрден ашык кан тапшырган.
Ошондой эле өлкө башчысы жана өкмөт дары-дармек алууга акчалай жардам берген.
