БИШКЕК, 10-июн. — Sputnik. Нарын шаарында канализациялык-насостук станциянын кудугуна түшкөн "Нарынсууканал" ишканасынын үч кызматкери ыплас суудан чыккан газга ууланып каза болду. Бул тууралуу ӨКМ билдирди.
Маалыматка ылайык, жумушчулар беш метр тереңдикке чейин түшкөн. Аларга жардам берүүгө түшкөн 31 жаштагы Жыргал Самсалиев жана 45 жаштагы Калыбек Усупов да ууланып, Тез жардам менен облустук ооруканага жеткирилишкен, абалдары канааттандырарлык экени айтылууда.
Ал эми 30 жаштагы Талантбек Абдылдаев, Алмаз Өмүрзаков жана 41 жаштагы Нурлан Дүйшөналиевдин жансыз денелерин кудуктан куткаруучулар алып чыгып, ишкананын жетекчилигине өткөрүп беришти.
