БИШКЕК, 7-июн. — Sputnik. Ош облусунун Кара-Кулжа районундагы Кара-Кулжа айылында 20 күндөн бери таза суу жок, айылдыктар сууну арыктан жана дарыядан ичип жатканын Марал Ражапова Sputnik Кыргызстан агенттигинин WhatsApp номери аркылуу билдирди.
Анын айтымында, азыркы тапта аймакта күн 30 градуска чейин ысып жатат.
"Район башчысы, айыл өкмөт жана тийиштүү кызматтар сууну чыгарууга ниети жок. Айылга суу келчү каналды сел бир ай мурун алып кетиптир. Аны тез арада оңдоп, элди таза суу менен камсыз кылууга аракеттерди көрбөй жатышат", — деди Ражапова.
Ал ошондой эле жогору жакта жайгашкан Биринчи Май сыяктуу айылдарда суу 24 саат бою чыгып, жерден 2-3 метрге чейин атырылып чыгып жатканын маалымдады.
"Айрым айыл тургундары өз чөнтөгүнөн эң аз дегенде 500 сомдон чогултуп Биринчи Май, Сары-Булак жана Ылай-Талаа айылдарынан суу ташып ичип жатышат", — деди жергиликтүү тургун. Ражапова ысыктын күнү ташып келген суусу ашып кетсе 2 күнгө жетерин белгиледи.
Эгер сиз кайсы бир окуяга күбө болуп, сүрөткө же видеого тартып алган болсоңуз, маалыматты биздин +996 706 566 544 WhatsApp номерибизге жөнөтсөңүз болот.
