БИШКЕК, 3-июн. — Sputnik. КМШ өлкөлөрүнүн премьер-министрлеринин жыйынына карата Бишкек — "Манас" аэропорту трассасы оңдолуп бүтпөйт. Бул тууралуу транспорт жана коммуникациялар министри Замирбек Айдаров Sputnik Кыргызстан агенттигине билдирди.
Маалыматка ылайык, жалпысынан 24 чакырым жол оңдолот, оңдоо иштери былтыр башталган. Анын наркы миллиард сомдон ашат. Алгач жолдун бир тилкеси оңдолуп, андан кийин экинчиси жасалат. Учурда жолдун түндүк тараптагы тилкесинин 7,5 чакырымдан 30,5 чакырымына чейинки аралыгы оңдолду.
"Жолдун түндүк тараптагы тилкесин 10-июнга карата бүтүрүүнү максат кылганбыз, бирок расмий делегациянын өтүүсү үчүн иштер убактылуу токтотулат. Андан сырткары, аба ырайы да өз таасирин берүүдө. Андыктан жолду 15-июнга чейин оңдоп бүтүрөбүз", — деди министр.
Анын айтымында, бардык иштер август айында өтчү КМШ мамлекеттеринин өлкө башчыларынын саммитине карата аяктайт.
