БИШКЕК, 1-июн. — Sputnik. Кыргызстанга расмий сапар менен Россиянын премьер-министри Дмитрий Медведев жана Казакстандын өкмөт башчысы Карим Масимов келет. Бул тууралуу ТИМдин Биринчи саясий департаментинин директору Айбек Молдогазиев маалымат жыйында билдирди.
Расмий сапарлар 6-7-июнда Бишкекте өтө турган КМШ өлкөлөрүнүн өкмөт башчыларынын жыйынынын алкагында болот.
Кыргызстандын премьер-министри Сооронбай Жээнбеков Медведев менен 6-июнь күнү жолугуп, төрт документке кол коюлат:
- Эки өлкө ортосундагы мунай жана мунай продуктулары жаатында кызматташуу боюнча макулдашуу;
- Социалдык-эмгек багытындагы кызматташуу;
- Кыргызстан менен Россиянын Тышкы иштер министрликтеринин ортосунда кызматташуу программасы;
- Интеллектуалдык менчик жана кызматташуу программасы боюнча меморандум.
Жээнбеков менен Масимовдун жолугушуусу 8-июнга белгиленген. Бул күнү Кыргызстан менен Казакстандын өкмөт аралык кеңеши өтүп, анда экономикалык байланыш, инвестиция, соода-экономикалык, чек ара, маданий, гуманитардык кызматташуу багытындагы маселелер талкууланат.
Мындан тышкары, КР жарандарынын Казакстанда жүрүү тартиби жана Казакстандын техникалык жана материалдык жардам көрсөтүү маселеси ортого салынат.
