БИШКЕК, 31-май — Sputnik. "Ата Мекен" фракциясы Ички иштер министрлигине Кашкар Жунушалиевдин талапкерлигин жактырды. Бул тууралуу аталган фракциянын маалымат кызматы билдирди.
Маселе каралып жатканда депутаттар талапкерге ар кыл суроолорду узатышты. Жунушалиев суроолорго жооп берип жатып, уюшкан кылмыштуу топтор менен күрөшөөрүн, реформа иши улантылаарын жана "Коопсуз шаар" долбоору ишке ашырылаарын билдирди.
Жунушалиев министр болушу үчүн Жогорку Кеңешке өкмөт башчы тарабынан сунушталып, ал депутаттар тарабынан колдоо табышы керек.
Буга чейин Жунушалиев Бишкек шаардык ички иштер башкы башкармалыгын жетектеп келген.
ИИМдин экс-жетекчиси Турганбаев Жунушалиевди "мыкты офицер" катары сыпаттап, анын бул жааттагы реформаларын улантып кете тургандыгын айтты.
