БИШКЕК, 19-май — Sputnik. КТРКнын алдында митинг болгонун телеканалдын башкы директору Илим Карыпбеков өзүнүн Facebook баракчасына жазды.
Анын айтымында, митингчилер КТРКда кумсаларды, ЛГБТ коомунун мүчөлөрүн жана булардын тарапташтарын чыгарбоону талап кылышкан.
"Нааразы тарап менен жолугушуп, алардын талаптарын угуп, өзүмдүн оюмду дагы билдирдим. Митинг тынч өттү", — деп жазган ал.
Карыпбеков митингчилердин бардык талаптары жана эскертүүлөрү эске алынып, сөзсүз жыйынтык чыгарыларын белгилейт.
Белгилей кетсек, май айынын ортосунда КТРКда Кыргызстандагы ЛГБТ өкүлдөрүнүн катышуусунда ток-шоу уюштурулган. Аталган көрсөтүү эфирге чыккандан кийин социалдык тармактарда түрдүү пикирлер айтылып, талаш-тартыштар жаралган болчу.
