БИШКЕК, 19-май — Sputnik. Жогорку Кеңештин төрагасы Чыныбай Турсунбеков Санкт-Петербург шаарында РФтин Федералдык жыйынынын Мамдумасынын төрагасы Сергей Нарышкин менен жолукканда кыргыз эмгек мигранттары тушуккан абал боюнча сөз кылды. Бул туурасында парламенттин маалымат кызматы кабарлады.
Турсунбеков эки тараптын алакасы өз ара ишеним жана достук мамилеге негизделгендигин айтты. ЖК төрагасы жолугушууда Кыргызстан ЕАЭБдин курамына кирип жаңы мүмкүнчүлүктөр ачылгандыгы менен али да жөнгө сала турган маселелер бар экенине токтолду.
"Кыргызстан ЕАЭБдин толук мүчөсү болгондуктан, жарандардын бир өлкөдөн экинчисинин аймагына өтүү тартиби боюнча эрежеде милдеттүү каттоого 30 күндөн кийин туруусу каралган. Бул боюнча документке кол коюлган. Ага карабай эмгек мигранттары бир топ кыйынчылыктарга тушугуп жатат",— деди Турсунбеков.
Учурда ЖКнын спикери жетектеген депутаттардан турган делегация КМШ өлкөлөрүнүн парламенттер аралык ассамблеясынын 44-отурумуна жана эл аралык "Евразиянын экономикалык келечеги" деп аталган форумга катышып жатат. Санкт-Петербург шаарында бүгүн башталган иш-чара 20-майда аяктайт.
