Өкмөт башчы Тажикстанга CASA-1000 энергетикалык долбоордук курулушун баштоо аземине катышуу үчүн келди. Сапарынын алкагында Жээнбеков Тажикстан, Афганистан жана Пакистандын жетекчилери менен жолугуп, өлкөлөр аралык кызматташуу маселесин талкуулап жатат.
Эртең, 12-май күнү делегация CASA-1000 энергетикалык долбоорунун курулушу баштала турган Турсунзаде шаарына барат. Мындан тышкары, төрт өлкөнүн делегациялары кыска маек үчүн жолугат. Ушуну менен Жээнбековдун Тажикстанга болгон иш сапары соңуна чыгат.
CASA-1000 линиясынын узундугу 750 чакырымды түзөт. Биринчи этапта Кыргызстан менен Тажикстандын энергетикалык системаларын бириктирген "Датка — Кожент" линиясы курулат. Андан соң электр өткөрүүчү линиялар Тажикстандан Афганистанга, андан Пакистандын Пешавар шаарына кетет. Долбоорду ишке берүү 2019-2020-жылдарга белгиленген.
Долбоор жалпысынан 1 миллиард долларга бааланган. Мында Кыргызстандын үлүшүнө 233 миллион доллар тийген.
