ДУШАНБЕ, 11-май — Sputnik. Кыргызстандын премьер-министри Соооронбай Жээнбеков Тажикстанга болгон сапарынын алкагында өлкө башчысы Эмомали Рахмон менен жолукту.
Өз сөзүндө Жээнбеков жылуу кабыл алгандыгы үчүн президентке ыраазычылык билдирип, бул жолугушуу эки тараптуу мамилелерди бекемдөөгө шарт түзөрүн белгиледи.
Рахмон өз кезегинде өкмөт башчыны көрүүгө куштар экенин айтып, CASA-1000 эки өлкө үчүн тең маанилүү долбоор экенине токтолду.
Сапарынын алкагында Жээнбеков Тажикстан, Афганистан жана Пакистандын жетекчилери менен жолугуп, өлкөлөр аралык кызматташуу маселесин талкуулап жатат.
Эртең, бейшемби күнү делегация CASA-1000 энергетикалык долбоорунун курулушу баштала турган Турсунзаде шаарына барат. Мындан тышкары, төрт өлкөнүн делегациялары кыска маек үчүн жолугат. Ушуну менен Жээнбековдун Тажикстанга болгон иш сапары соңуна чыгат.
Эскерте кетсек, CASA-1000 линиясынын узундугу 750 чакырымды түзөт. Биринчи этапта Кыргызстан менен Тажикстандын энергетикалык системаларын бириктирген "Датка — Кожент" линиясы курулат. Андан соң электр өткөрүүчү линиялар Тажикстандан Афганистанга, андан Пакистандын Пешавар шаарына кетет. Долбоорду ишке берүү 2019-2020-жылдарга белгиленген.
Долбоор жалпысынан 1 миллиард долларга бааланган. Мында Кыргызстандын үлүшүнө 233 миллион доллар тийген.
