БИШКЕК, 7-май — Sputnik. Борбор калаанын Биринчи Май райондук соту Максим Бакиевди сыртынан 30 жылга эркинен ажыратуу чечимин кабыл алганын Жогорку Соттун маалымат кызматы билдирди.
29-апрелде сот ачык жыйында Максим Бакиевдин, Сергей Кимдин, Денис Гладышевдин, Ульяна Пактын, Низира Иминованын, Пулат Иминовдун, Алексей Елисеевдин кылмыш ишин караган. Сот Бакиевди КР Кылмыш Жаза кодексинин 190-беренеси "Келишим түзүүгө, же андан баш тартууга мажбурлоо", 183-беренеси "Кылмыш жолу менен табылган каражатты адалдоо" жана 170-беренеси "Опузалоо" менен айыптуу деп тапты.
"Биринчи Май райондук соту Максим Бакиевди 30 жылга эркинен ажыратып, катуу режимдеги колонияда жазасын өтүүнү жана үй-мүлкүн камакка алуу менен беш миң сом айып төлөөнү, үч жыл бою мамлекеттик кызматтарды ээлөө укугунан ажыраткан өкүм чыгарды", — деп айтылат билдирүүдө.
Иши чогуу каралган Сергей Ким 17 жылга эркинен ажыратылып, катуу режимдеги колонияда жаза мөөнөтүн өтөйт.
Денис Гладышев 15 жылга эркинен ажыратылып, катуу режимдеги колонияда жаза мөөнөтүн өтөйт.
Ульяна Пак 15 жылга эркинен ажыратылып, аялдар колониясында жаза мөөнөтүн өтөйт.
Пулат Иминов эки жылга эркинен ажыратылып, катуу режимдеги колонияда жаза мөөнөтүн өтөйт.
Алексей Елисеев эки жылга эркинен ажыратылды.
Соттун өкүмүн он күн ичинде Бишкек шаардык сотуна даттанууга болот.
Максим Бакиев 2010-жылдан тарта эл аралык издөөгө алынган. Кээ бир маалыматтарга караганда ал Лондондо жашап, ал жактан саясый баш паанек суроодо.
