БИШКЕК, 29-апр. — Sputnik. Эл өкүлү Жанар Акаев парламенттин отурумунда жыл сайын чет жактагы окуу жайларга берилген квоталар акыйкатсыз бөлүнүп жатат деген пикирин билдирди.
Аталган маселе боюнча суроолорду Sputnik Кыргызстан агенттиги Билим берүү жана илим министрлигине жолдоп төмөнкүчө жооп алды:
2015-жылдын маалыматы боюнча 14 миң 651 кыргызстандык студент чет өлкөдө билим алууда.
Кыргызстандык студенттер Россия, Казакстан, Белоруссия, Тажикстан, Түркия, Кытай, Түштүк Корея, АКШ, Германия, Япония, Франция, Бельгия, Италияда негизинен төмөнкү адистиктери боюнча билим алууда:
- Социалдык-гуманитардык багытта (менеджмент, маркетинг, экономика, юриспруденция, филология, педагогика);
- Инженер-техникалык багытта (архитектура, курулуш, нефтегаз, гидрометеорология, тоо-кендери);
- Технологиялык багытта (химия-технологиялык өнөр-жай, тамак-аш өнөр-жай, агрардык-тамак-аш өнөр жай).
- Бүгүнкү күндө гранттык орун бөлүп берип жаткан бардык мамлекеттер документтерди онлайн түрдө кабыл алууда. Чет өлкөдө окуу боюнча маалыматтарды Билим берүү жана илим министрлигинин сайтынан жана КРдеги элчиликтердин тиешелүү бөлүмдөрүнөн, Билим берүү жана илим министрлигинин "Кутбилим" гезитинен алууга болот.
- Кайсы бир өлкөнүн жогорку окуу жайында билим алуу үчүн гранттык орунга сынак жарыялангандыгы боюнча маалымат Билим берүү жана илим министрлигинин расмий сайтына жайгаштырылат. Мамлекеттик улуттук тест жүргүзүү борбору аркылуу гранттык орунга талапкер абитуриент тесттен өтөт. Жогорку упай алган абитуриенттин документтери аталган министрлик тарабынан гранттык орун бөлгөн өлкөгө сунушталат. Акыркы чечимди чет өлкөнүн жогорку окуу жайлары кабыл алат.
Sputnik Кыргызстан агенттигинин чет жакта билим алгандардын арасында мамлекеттик кызматтарда иштегендердин (министрлик, облустагы өкүлчүлүктөр) жана Жогорку Кеңеш депутаттарынын балдарынын бар-жогу жана саны боюнча суроого аталган министрлик Конституциянын 45-беренесине жана "Билим берүү жөнүндө" мыйзамга ылайык, Кыргызстандын ар бир жараны билим алууга укуктуу деп жооп берди.
