БИШКЕК, 28-апр. — Sputnik. Жыл сайын чет жактагы окуу жайларга берилген квоталар акыйкатсыз бөлүнүп жаткандыгы тууралуу парламентте ар кандай маселелер талкуусунда депутат Жанар Акаев билдирди.
Анын айтымында, кайсы окуу жайга канча квота берилгендиги, окууга тапшыруу шарттары тууралуу маалыматтар карапайым студенттерге жетпей келет.
"Мына Кипрдеги окуу жайларга 15 орундук квота берилди. Бирок окуучулар менен студенттердин калың катмарына гезит, радио, теле аркылуу маалыматтар берилбей жатат. Бул маалыматтык саясаттын жоктугун көрсөтүүдө", — дейт Акаев.
Депутат чет жактагы окуу жайларга берилген квоталарды Билим берүү жана илим министрлиги эмес, Тышкы иштер министрлиги көзөмөлдөй турганын айтып, окууга тааныш-билиш, тууган-туушкандардын балдары кетип жатканын кошумчалады.
"Казакстандагы Нурсултан Назарбаев атындагы университетке Кыргызстан үчүн эки орун берилген экен. Бирок барган эки бала тестти тапшыра албай уят болуп келишиптир", — дейт Акаев.
Ал чет өлкөгө чыныгы билимдүү жаштарды жиберүүнү камсыздоо керек экенин кошумчалады.
