БИШКЕК, 27-апр. — Sputnik. Бишкек — Нарын — Торугарт кан жолунун айланма жолунда жүк ташуучу унаа менен фура сүзүшкөнүн кырсыктын күбөлөрү айтышты.
Авария болжол менен саат 16.20да болгон. Анын кесепетинен жүк ташуучу унаада келе жаткан аял каза болгону маалымдалды. ГАЗ-53 унаасы "Тазалык" муниципалдык ишканасына тиешелүү болуп чыкты.
Аталган ишкананын жетекчиси Рысбек Сарпашев жол кырсыгы болгонун тастыктап, жүк ташуучу унаа аварияга таштанды полигонунан Бишкекке кайтып келе жатканда кабылганын белгиледи.
"Алдын ала маалымат боюнча кырсыкка карама-каршы тилкеге чыга калган Renault фурасынын айдоочусу күнөөлүү. Ал күнөөсүн моюндап жатат", — деди Сарпашев.
Кайгуул милициясынын башкы башкармалыгы жол кырсыгы боюнча кенен маалыматты кийинчерээк берерин билдирди.
Азырынча ГАЗ-53 унаасынын айдоочусу алган жарааттарынан улам ооруканага жеткирилгени белгилүү болду.
