ОШ, 25-апр. — Sputnik. Ош шаардык кеңешинин иши расмий түрдө башталып, көпчүлүк коалиция түзүлдү. Бул тууралуу КСДП партиясынын өкүлү Жапар Ормонов билдирди.
КСДП, "Бир Бол" жана "Мекеним Кыргызстан" фракциялары кирди.
Маалыматка ылайык, сессияны жаңы курамдын аксакал депутаты Расулберди Раимбердиев ачты. Анда депутаттарга мандат тапшыруу аземи болуп, мындан соң коалициянын курамы талкууланды.
"Көпчүлүк коалицияга КСДП, "Бир Бол" жана "Мекеним Кыргызстан" фракциялары кирди. Ал эми азчылык коалициянын курамын "Республика — Ата-Журт", "Кыргызстан" жана "Өнүгүү-Прогресс" фракциялары түздү", — деди Ормонов.
Эми шаардык кеңеш спикерди тандоо маселесин карайт.
Эске сала кетсек, Ош шаардык кеңешке болгон шайлоодо "КСДП" партиясы — 16, "Кыргызстан" партиясы — 9, "Мекеним Кыргызстан" — 6, "Республика – Ата-Журт" — 5, "Бир Бол" — 5, "Өнүгүү-Прогресс" — 4 мандат алган.
