БИШКЕК, 20-апр. — Sputnik. Бишкекте жол эрежесинин бузулушун видеокаттоого алган жабдуулар орнотула элек. Бул тууралуу Sputnik Кыргызстан агенттигине ИИМ Кайгуул милициясынын ишмердүүлүгүн жөнгө салуу башкармалыгынын жетекчиси Нур Сатыбалдиев билдирди.
Буга чейин интернет айдыңында борбор калаанын айрым көчөлөрүндө видео каттоо жабдуулары орнотулганы айтылган.
Сатыбалдиев социалдык тармактын колдонуучулары талкуулап жаткандар жөн гана видеокамералар экенин маалымдады.
"Талкууланып жаткан видеокамералар интернет провайдерлердин бириники. Азырынча Сокулук районундагы унаа базарда гана видеокаттоочу жабдуу орнотулган", — дейт Сатыбалдиев.
Мыйзамга ылайык, коомдук жайларда (аянттарда, базарларда, сейил бактарда, унаа жолдордо), унаа токтоочу жайларда видеокамералар орнотулушу керек.
Аталган мыйзамга өлкө башчысы Алмазбек Атамбаев өткөн жылдын 22-майында кол койгон.
