БИШКЕК, 19-апр. — Sputnik. Эртең борбор калаада жазуучу Насирдин Байтемировдун 100 жылдыгына арналган көргөзмө ачылат. Бул туурасында мэриянын маалымат кызматынан билдиришти.
Көргөзмө Токтогул атындагы адабият жана искусство музейинде өтөт.
"Иш-чарага жазуучунун үй-бүлөсү, жакындары, достору, айылдаштары жана жогорку окуу жайлардын студенттери катышат",— деп айтылат мэрия тараткан маалыматта.
Насирдин Байтемиров Чүй өрөөнүнө караштуу Кегети айылында 1916-жылы туулган.
Анын чыгармачылыгында орчундуу орунду тарыхый мазмундагы чыгармалары ээлейт. 1966-жылы "Тарых эстелиги" романын, кийин "Уркуя" драмасын жазган. Драматург катары "Уркуядан" башка, "Күйөө", "Ким күнөөлүү?", "Жолдо" аттуу драмалардын, айтылуу "Аста-секин, колукту" музыкалуу комедиясынын автору.
Жазуучу 1996-жылы дүйнөдөн кайткан.
