БИШКЕК, 19-апр. — Sputnik. Бишкек мэриясы ар бир маршруттук таксинин айдоочусу менен келишим түзүүнү сунуштап жатат. Бул тууралуу Sputnik Кыргызстан агенттигине калаа башчысы Албек Ибраимов билдирди.
Анын айтымында, ар бир айдоочу жеке ишкер катары катталып, эмгек патенти менен иштейт.
"Биз көп учурда маршруттук таксилердин айдоочуларын жазага тарта албай келебиз. Эгерде ар бир айдоочу менен келишим түзсөк, аларда жоопкерчилик пайда болот. Айдоочулардын сөгүнгөнүнө, унааларын таза кармабаганына, жүргүнчүлөр менен болгон мамилесине нааразы болгондор арбын. Ошондуктан жогорудагы ой жаралды", — дейт Ибраимов.
Мындан сырткары, Ибраимов учурда ар бир жүргүнчүнү ташууга канча чыгым кетери эсептелип жатканын айтты. Ал бул кадамдын арты менен жол акысы көтөрүлбөстүгүн кошумчалады.
