БИШКЕК, 18-апр. — Sputnik. Бишкек мэриясынын киреше саясат башкармалыгы тарабынан Кытайдын "Шуаншинь" ЖЧКсынын эсебине 6 миллион 049,5 миң сом негизсиз которулгандыгы аныкталды. Бул тууралуу Эсеп палатасы билдирди.
Маалыматка ылайык, 2008-жылы кытай компаниясынын лотерея билеттерин жасап берген иши 30 миллион 217 миң сомду түзгөн. 2008-2009-жылы бажы алымдарын жана салыктарды эсепке алуу менен муниципалитет билеттерди алгандыгы үчүн кытай компаниясына 30 миллион 256 миң сом которгон.
Анын ичинен 24 миллион 168 миң сом кытай компаниясынын эсебине которулса, 6 миллион 088,7 миң сом – бажы алымдарына жана салыктарга төлөнгөн.
Которулган сумма алынган товардын наркынан ашып кеткендиги жүргүзүлгөн аудиттин жүрүшүндө аныкталган.
Муниципалитеттин киреше саясаты башкармалыгы менен кытай компаниясынын ортосундагы салыштыруу актысына 2014-жылдын 1-июлунда гана кол коюлган. 2008-жылдан бери тараптар ортосунда кытай компаниясы алдындагы карызды таануу жөнүндө салыштыруу актысы болгон эмес.
Ошентсе да, 2013-жылдын 6-декабрындагы нотариалдык жактан күбөлөндүрүлбөгөн ишеним каттын негизинде иш алып барган кытай компаниясынын өкүлүнөн келген каттын, ошондой эле салыштыруу-актынын негизинде эле Бишкек шаарынын мэриясы компаниянын эсебине 6 миллион 049,5 миң сом өлчөмүндөгү бюджеттик каражаттарды которуп салган.
Салыштыруу актысына кол коюлган учурдагы салыктарды жана алымдарды эсепке алуу менен которулган сумма, алынган товардын наркынан ашып кеткендиги аныкталды.
"Мындан сырткары, келишим шарттары боюнча салыктарды жана бажы алымдарын төлөө "Счастливая лотерея" утуш муниципалдык дирекциясынын милдеттерине кирген эмес. Ошентип, Бишкек шаарынын мэриясы тарабынан акча каражатын негизсиз которууга жол берилген",— деп айтылат маалыматта.
Белгилей кетсек, Бишкек шаарынын мэриясынын киреше саясаты башкармалыгы 2014-жылдын октябрында жоюлган.
