БИШКЕК, 13-апр. — Sputnik. Премьер-министрликке талапкер Сооронбай Жээнбеков транспорт жана коммуникация министрлигине Балыкчы — Бишкек унаа жолунун тендери боюнча жаңжалда аты аталган Замирбек Айдаровду сунуштаган себебин түшүндүрүп берди.
Учурда Жогорку Кеңеш талапкер менен жаңы өкмөттүн курамын, түзүмүн жана программасын бекитип берди.
Жээнбеков депутаттардын транспорт министри боюнча суроосуна жооп берди.
"Биз Айдаровдун өмүр баянын тууган-туушкандарына чейин иликтеп чыктык. Эмгек жолун карап көрүңүздөр, башынан баштап жол тармагында иштейт экен. Иштин көзүн тааныбаган адамды бул кызматка алып келүүнү туура эмес деп эсептедик. Мен аны менен жолугуп, министрлик кызматта абийирдүү иштеп берүүсүн сунуштадым", — деди Жээнбеков.
Бул боюнча түзүлгөн депутаттык комиссиянын жыйынында Аргынбек Малабаев тендер Темир Сариевдин жакындары жана орун басары Улан Уезбаевдин кийлигишүүсү менен өткөнүн билдирген.
Президент Алмазбек Атамбаев комиссиянын корутундусу менен Малабаевдин айткандарын текшерип чыгууну УКМКнын Коррупцияга каршы кызматына тапшырган.
Бул жаңжалдан улам дүйшөмбү күнү Темир Сариев өкмөт башчылыктан кеткен.
