БИШКЕК, 12-апр. — Sputnik. Борбор калаадагы мечиттердин биринен баасы 3500 сомдук күрмө уурдаган деп шектелген жаран кармалганын Бишкек ШИИББдин маалымат кызматы билдирди.
10-апрелде Бишкек шаарынын тургуну милицияга арыз жазып, Жибек-Жолу менен Шопоков көчөлөрүнүн кесилишиндеги мечиттен бейтааныш киши күрмөсүн уурдап кетенин билдирген.
Ыкчам иликтөө иш-чараларынын жүрүшүндө шектүү катары Бишкек шаарынын 25 жаштагы тургуну кармалды.
Ал аталган мечиттен он жолу ушундай уурулукка барганын мойнуна алган. Кылмыш жаза кодексинин 164-беренеси (Уурулук) боюнча кылмыш иши козголду. Шектүү жаран Бишкек ШИИББдин убактылуу кармоо жайына киргизилди.
