БИШКЕК, 8-апр. — Sputnik. Өзгөчө кырдаалдар министрлиги аба ырайынын начарлашынан улам күчөтүлгөн тартипте иштөөгө өтүп жатканын билдирди.
Кыргызгидрометтин маалыматы боюнча Ысык-Көл, Нарын, Талас, Чүй облустары менен Бишкек шаарында нөшөрлөгөн жаан жаап, шамалдын ылдамдыгы секундасына 15-20 метрге чейин жетери күтүлүүдө.
Маалыматка ылайык, күн 9 градуска чейин жылыйт.
Ошондой эле 9-10-апрелде Чүй, Талас, Баткен, Ош, Жалал-Абад облустарында жаан жаап, түнкүсүн тоо этектеринде ал карга айланышы, тоолуу райондордо кар жаашы күтүлөт.
Бийик тоолуу аймактардын автожолдорунда кар күрткүсү жана жолдор тоңголок, тайгак болушу күтүлөт.
Мындан улам министр Кубатбек Боронов ӨКМнын күчөтүлгөн режимде иштөөсү боюнча буйрукка кол койду.
