БИШКЕК, 8-апр. — Sputnik. Көз карандысыз мамлекеттердин шериктештик уюмун реформалоого терең ойлонуу менен мамиле жасоо керек. Бул тууралуу КР тышкы иштер министри Эрлан Абдылдаев Москвада өткөн КМШ өлкөлөрүнүн ТИМ башчыларынын кезектеги жыйында билдирди.
Маалыматка ылайык, Кыргызстан төрагалык кылган жыйында КМШ өлкөлөрүнүн министрликтеринин өз ара аракеттенүүсү, аскердик, саламаттык сактоо, маданият жаатындагы кызматташуу маселелери талкууга алынды.
Кыргызстан өз пикирин так билдирип, Көз карандысыз мамлекеттердин шериктештик уюмун реформалоого терең ойлонуу менен мамиле жасоо керек экени белгиледи. Мында республика мурунку СССР айдыңындагы мамлекеттер үчүн КМШ диалог үчүн жападан жалгыз аянт деген пикиринен жанбай турганы айтылды.
Эскерте кетсек, 7-8-июнь күндөрү КМШ өкмөт башчыларынын, ал эми 15-сентябрда ТИМ башчыларынын жыйыны өтөт. 16-сентябрь күнү КМШ өлкөлөрүнүн мааракелик саммити болот.
Тышкы иштер министрлиги учурда Кыргызстан уюмдук мааракелик жыйынын өткөрүүгө даярдыктар башталганын белгиледи.
