БИШКЕК, 8-апр. — Sputnik. Премьер-министр Темир Сариев Кыргызстанга иш сапар менен келген РФтин Мамдумасынын төрагасы Сергей Нарышкин менен жолукту. Бул тууралуу өкмөттүн маалымат кызматы билдирди.
Жолугушууда эки өлкө ортосундагы кызматташуунун актуалдуу маселелери жана келечектеги багыттары талкууланды.
Премьер-министр Кыргызстандын Евразия экономикалык биримдигине кошулуусунун алкагында кызматташуу активдешкенин белгилеп, эки өлкө ортосундагы алаканы мындан да күчөтүү зарылдыгын билдирди.
"Россия — биздин негизги стратегиялык өнөктөштөрдүн бири. ЕАЭБ алкагында жана кызматташууну өнүктүрүү боюнча чечим кабыл алынып, бул жаатта Россия өзүнүн колдоосун көрсөтүп келе жатат", — деди Сариев.
Ошондой эле жолугушууда эки өлкө ортосундагы парламенттер аралык кызматташууну өнүктүрүү, миграция маселелерин жөнгө салуу талкууланды. Өз кезегинде Нарышкин Россия менен Кыргызстандын ортосунда кызматташуунун өнүгүшүнө оң баа берип, бул жааттагы бир катар аракеттерди көрүү керектигин белгиледи.
