БИШКЕК, 5-апр. — Sputnik. Борбор калаанын чок ортосунан атышкандар уюшкан кылмыштуу топтун мүчөсү болушу ыктымалдыгын ИИМдин маалымат кызматы билдирди.
Белгилей кетсек, Чүй жана Алматы көчөлөрүнүн кесилишинде саат 19.30дар чамасында Subaru Legacy автоунаасынан белгисиз кишилер ок чыгарып, бир киши жаракат алган.
"Атышуудан жаракат алган бир киши Улуттук хирургиялык борборго алып келинди. Дарыгерлер чараларды көрүп жатат. Жаракат алган киши кылмыш дүйнөсүндө "Cакал" деген каймана ат менен белгилүү кылмышкердин тобунан болушу мүмкүн. Окуя болгон жерде райондук, шаардык милиция иштеп жатат", — деп маалымат кызматы билдирди.
Алдын ала маалыматтар боюнча бул атышуу уюшкан кылмышуу топтун мүчөлөрү ортосунда болгон. Шектүүлөрдү кармоо үчүн "Перехват" планы жарыяланды.
