БИШКЕК, 5-апр. — Sputnik. "Мишка" аттуу Тянь-Шань күрөң аюусу жакшы шартта, доктурлардын көзөмөлүндө экенин Sputnik Кыргызстан агенттигине Мамлекеттик аңчылык чарбасынын директору Алтымыш Ибраимов билдирди.
Бир канча күндөн бери интернет колдонуучулары Токмокто кармалган аюунун айланасында кызуу талкуу жаратышкан. Аны жер төлөдө кармап, татыктуу мамиле жасабай жаткандарга нааразы болушкан.
Ибраимовдун айтымында, аталган аюу кышында браконьерлерден сатып алынган.
"Сатып алган учурда аюунун абалы начар болчу. Өлүп калабы деп кооптонгонбуз. Мал доктурлар кам көрүп, учурда абалы жакшы", — дейт мүдүр.
Аюуну жеринен барып тартып келген журналист Юрий Копытин Ибраимовдун сөзүн тастыктап, аюу жакшы шартта каралып жатканын айтты.
Ибраимов жакын арада аюу үчүн атайы ыңгайлуу жай салына турганын кошумчалады.
