БИШКЕК, 31-мар. — Sputnik. Москва шаарында издөөдө жүргөн унаа Бишкек — Ош жолунда кармалганын Ички иштер министрлигинин маалымат кызматы билдирди.
Ага ылайык, BMW-Х5 үлгүсүндөгү уурдалган унаа тууралуу ИИМдин тергөө башкармалыгына маалымат түшүп, аталган унааны "Сосновка" өткөрүү пунктунан токтотууга аракет кылганда баш бербей качкан. Андан улам аталган унаа Жалал-Абад облусуна караштуу Токтогул районунда кармалган.
"ИИМдин тергөө башкармалыгынын кызматкерлери тарабынан BMW-Х5 үлгүсүндөгү унаа Токтогул районунда кармалды. Тинтүү учурунда анын айдоочусу 36 жаштагы Тажикстандын жараны экенин аныкталган. Ал унаага Казакстандын документтерин көрсөткөн. Казакстандын ИИМ тарабынан маалымат суралганда аталган унаа каттоодо турганы белгилүү болгон. Андан соң аталган унаага Москва шаардык ички иштер башкармалыгы тарабынан издөө салынганы ачыкталды", — деп айтылат маалыматта.
Уурдалган унаанын базар баасы 2 миллион 800 миң сомду түзөрү аныкталган.
Учурда тергөө амалдары жүрүп жатат.
