Сариев: туристтер үчүн коопсуздук менен маданияттуулук камсыздалышы керек

Жазылуу
Yandex newsTelegram
Бүгүнкү күндө 1,2 миллиард адам дүйнөнү тынымсыз кыдырып турат. Алардан түшкөн каражаттын жалпы суммасы 1,5 триллион АКШ долларын түзөт.

БИШКЕК, 30-мар. — Sputnik. Кыргызстанга туристтерди тартуу үчүн биринчи кезекте коопсуздук менен маданияттуулукту камсыздоо керектигин премьер-министр Темир Сариев өлкөдөгү туризмди өнүктүрүү боюнча программанын бет ачарында билдирди.

Туристтер Азиядагы 9 мамлекет үчүн "Жибек Жолу" визасын алгысы келет
Анын айтымында, Ысык-Көл, Сары-Челек жана Соң-Көл сыяктуу аймактардагы шартты жакшыртуу башкы маселе. Андан кийинки орунда тоо туризми, кышкы туризм, медициналык туризм, тарыхый маанидеги ыйык жерлер жана улуу чокулар турат.

Элдин социалдык абалын оңдоодо туризмдин орду чоң экенин айткан Сариев Кыргызстан 66 мамлекеттин жарандарына визасыз өтүү режимин киргизгенин кошумчалады. 

"Эл аралык туризм өлкөдөгү жалпы кирешеге салым кошууда орду зор. Андыктан Кыргызстан сырттан келген жарандар келип, эс ала турган, билим ала турган жана ден соолугун чыңдай турган ажайып жерге айланышы биз үчүн абдан маанилүү. Ал үчүн эң жогорку тейлөө сапаты болуш керек", — деди өкмөт башчы.

Премьер-министр Кыргызстанда туристтердин келиши жыл сайын 7 пайызга көбөйүп жатканын белгилеп, муну эки-үч эсе арттырууга болорун кошумчалады. 

"Бирок биринчи кезекте алардын коопсуздугун толук камсыздашыбыз зарыл. Антпесе, бир да турист келбейт. Экинчиден, бизде эң жогорку маданияттуулук болушу шарт. Муну менен катар өлкөнүн атагын чыгара турган бренд болушу кажет, бул багытта иштерди жүргүзүп, өлкөнү даңазалоо багытында аракеттерди күчөтүү керек", — деди Сариев.

Бүгүнкү күндө 1,2 миллиард адам дүйнөнү тынымсыз кыдырып турат. Алардан түшкөн каражаттын жалпы суммасы 1,5 триллион АКШ долларын түзөт.

Жаңылыктар түрмөгү
0