БИШКЕК, 20-мар. — Sputnik. Казакстандагы мажилиске (төмөнкү палатага) жана маслихаттарга (жергиликтүү кеңеш) мөөнөтсүз шайлоо бүгүн башталды. Саат эртең мененки 7:00дөн тарта өлкөнүн көпчүлүк аймактарында шайлоо участоктору ачылды.
Борбордук шайлоо комиссиясынын маалыматтарына караганда, 9,84 миң шайлоо участоктору ачылат. Парламенттеги шайлоого 9,889 миллион бюллетень, ал эми жергиликтүү кеңештерге 18,321 миллиону даярдалган.
Парламенттеги депутаттык орун үчүн алты партиянын өкүлдөрү ат салышат. Казакстандагы шайлоого 18 жашка чыккан бардык жарандары катыша алат жана алардын саны 9,79 миллионго жетет.
Жалпысынан 98 мандат үчүн алты партиядан 234 талапкер ат салышат. Партиялык тизме боюнча ат салышчулар: "Нур Отан" партиясы (127 талапкер), "Ак жол" партиясы (35 талапкер), "Ауыл" партиясы (19 талапкер), Казакстандын коммунисттик элдик партиясы (22 талапкер), Жалпы улуттук социал-демократиялык партиясы (23 талапкер) жана "Бирлик" партиясы (8 талапкер).
Мажилис депутаттары 13-январда Назарбаевге "экономикалык кырдаалдан улам" аларды таратып, мажилис менен маслихаттардын депутаттарын мөөнөтсүз шайлоо боюнча кайрылышкан. Президент алардын өтүнүчүн орундатып, парламентти таратуу туурасында Жарлыкка 20-январда кол койгон.
Мажилиске шайлоо акыркы жолу 2012-жылдын январь айында болуп, ага бийликчил "Нур Отан", Казакстандын демократиялык "Ак Жол" жана Казакстандын коммунисттик партиялары катышкан.
Депутаттар беш жылга шайланат.
