БИШКЕК, 19-мар. — Sputnik. Boeing учагында каза болгон жүргүнчүлөрдүн туугандарына жөлөк пул төлөнөт бул тууралуу Sputnik маалымат агенттигинин кабарчысын жеринен билдирди.
Белгилей кетсек, 19-мартта Бишкек убактысы боюнча 6.40тар чамасында Дубайдан Ростов-на-Дону шаарына учуп келген Fly Dubai компаниясына таандык Boeing 737-800 учагы конуп жатып кулап, 55 жүргүнчү жана экипаждын жети мүчөсү каза болгон. Экипаждын катарында 1988-жылы туулган Кыргызстандын жараны Жылдыз Насирдинова дагы болгонун КРдин ТИМи билдирди. Насирдинова Fly Dubai авиакомпаниясында стюардесса болуп иштеген.
Кабарчынын айтымында, аэропорттун жетекчилиги каза болгон жүргүнчүлөр менен экипаждын тизмезин маалыматтык тактага чыгарды.
Каза болгондордун жакындарына канча жөлөк пул төлөнөрү азырынча белгисиз. Бериле турчу каражат Ростов облусунун бюджетинен төлөнөт. Облус губернатору Василий Голубев каза болгондордун жакындарына жөлөк пул төлөнүшү керектигин тийиштүү жетекчилерге тапшырды.
Чет элдик жарандардын туугандарына азырынча жөлөк пул төлөнүп, төлөнбөсү боюнча маалымат жок.
Кырсык болгон жерге башка мамлекеттин консулдуктарынын өкүлдөрү да келишти.
