БИШКЕК, 14-мар. — Sputnik. Мугалимдерге турак-жай алуу үчүн 12-14 пайыздык үстөк менен 15 жылга берилчү үч миллион сом насыя 2-3-күндүн ичинде бериле баштарын премьер-министр Темир Сариев Жогорку Кеӊештин парламенттик көпчүлүк коалициясынын жыйынында депутат Узарбек Жылкыбаевдин суроосуна жооп берип жатып билдирди.
Белгилей кетсек, өкмөт башчы 2016-жылы Кыргызстандын социалдык-экономикалык жактан туруктуу өнүктүрүүнү камсыз кылуу боюнча маалымат берди.
Эл өкүлү Жылкыбаев мугалимдерге турак-жай алуу насыя февраль айында эле берилиши керектигин айтып, ал эмнеге создуктурулуп жатканына кызыкты.
Андан сырткары жыл аягына чейин облустун борборлорунда 40-60 батирлик көп кабаттуу үйлөр куруларын белгиледи. Учурда аны сала турчу компанияларга тендер жарыяланып, анын жыйынтыгы март айынын аягында бүтө турганын айтты. Бул үйлөр социалдык тармакта иштеген – мугалимдер, дарыгерлер, маданият кызматкерлери жана майыптарга берилерин өкмөт башчы баса белгиледи.
Эгер мугалимдер көп кабаттуу үйдөн 70 чарчы метрден ашпаган батир алса, же аянты 150 чарчы метрден ашпаган жер там алса 3 миллион сом 15 жылдык мөөнөткө 12 пайыздык үстөк менен берилет.
