БИШКЕК, 14-мар. — Sputnik. Түркиянын борбору Анкара шаарындагы жардыруудан кыргызстандык жарандардын жапа чеккен-чекпегени тууралуу маалымат жок. Бул тууралуу Тышкы иштер министрлиги билдирди.
Жекшемби күнү Түркиянын борбор калаасында жардыруу болуп, андан 34 адам көз жумуп, 125и жарадар болгон. Өлкө бийлиги бул кырсыкты теракт деп атады.
"Түркия эч кандай маалымат бербегендиктен кырсыктан жапа чеккен кыргызстандыктардын бар-жогу билинбей жатат", — деп айтылат билдирүүдө.
Жардыруу өлкөнүн премьер-министринин кеңселеринин биринин жанындагы аялдамада болгон. Дал ушул учурда аталган аймакта эл көп чогулуп турган. Полициянын айтымында, кырсык эки автобустун ортосундагы мина коюлган жеңил унаанын жарылуусунан келип чыккан.
Түркия бийлиги терак тууралуу маалымат каражаттарында чагылдырууга тыюу салды.
