БИШКЕК, 14-мар — Sputnik. Түркиянын борбору Анкара шаарында теракт катталып, жай тургундар жабыркаганын РИА Новости билдирет.
Түркиянын борбор калаасынын губернаторунун билдиришинче, жекшемби күнү Анкарада болгон жардыруудан 27 адам каза болуп, 75 жаран жабыркады.
Маалыматка ылайык, жардыруу премьер-министрдин имараты жайгашкан Гувенпарк районунда болуп, анда бир автобус толугу менен күйүп кетти.
Полициянын божомолунда жардырууга мина коюлган унаа себепкер болуп, ал эки автобустун ортосуна келип жарылган.
"Мина коюлган унаадагы жардыруудан улам 27 адам каза болуп, 75 жаран оор жаракат алды",— деп айтылат маалыматта.
КРдин Түркиядагы элчилиги кыргызстандыктардын бар-жогун тактап жатышат. Элчиликтин маалымат кызматынын айтымында, теракт Кызылай районунда катталган.
"Биз бардык маалыматтарды тактап жатабыз. Кырсыкка кабылгандардын арасында мекендештерибиз жок деген үмүттөбүз",— дейт элчиликтин маалымат кызматы.
Бир ай мурда Анкарада уюштурулган террактан 28 киши каза болгон эле.
