БИШКЕК, 10-мар. — Sputnik. Майып кызды тебелеп кеткен айдоочу №1 тергөө абагына эки айга камакка алынганын Бишкек ШИИБ билдирди.
Ишемби күнү эртең менен саат 6.30дар чамасында Кулуев көчөсүнөн майып кызды машина коюп кетип, ал окуя болгон жерде каза болгон. Айдоочу окуя болгон жерден качып, бирок, номери түшүп калгандыктан кайта келген. Өз сөзүндө ал итти тебелеп кеттим деп ойлогонун айткан.
"Ленин райондук соту аталган жаранды №1 тергөө абагына эки айга камакка алуу чечимин чыгарды", — деп айтылат билдирүүдө.
Кылмыш иши кодекстин 281-беренесинин (Жол эрежесин бузуу жана мас абалында же баңгизат колдонуп унаа башкаруу) негизинде козголду.
Кармалган жаран буга чейин Кылмыш жаза кодексинин аткезчилик, адамдын ден соолугуна атайылап залал келтирүү жана уурулук беренелери боюнча айыпталган. Бирок, бир дагы берене боюнча жоопко тартылган эмес.
