БИШКЕК, 10-мар. — Sputnik. Бүгүн таңда Бишкек шаарындагы кичи райондору тарапта арыктан өлүү табылган ымыркай эркек бала жана тогуз айлык болуп төрөлгөндүгү аныкталды. Бул туурасында Бишкек шаардык милициянын маалымат кызматы кабарлады.
Алма-Ата жана Аалы Токомбаев көчөлөрүнүн кесилишиндеги арыктан "Тазалык" ишканасынын жумушчулары таңкы саат жетилер чамасында ымыркайдын баштыкка салынган денесин таап, милицияга кабарлашкан.
"Милиция жана соттук-медициналык экспертизанын эксперти кароо жүргүзүү убагында каза болгон жаңы төрөлгөн наристе көк түстөгү жуурканга жана ак түстөгү, "Спасибо за покупку!" деген жазуусу менен болгон пакетке оролуп жаткандыгын аныктады", — деп кабарлашты шаардык милициядан.
Маалымат кызматы ымыркайдын денесинде эч кандай жаракаттары болбогондугун, арыкта жаткан экинчи баштыктан бир нече медициналык буюмдар табылганын билдирди.
"Наристенин өлүгүнүн жанында ак түстөгү полиэтилен пакеттен кочкул кызыл түстөгү тактары менен төрт даана медициналык кол кап, кочкул кызыл түстөгү беш даана медициналык пахта жана чел кабык табылган", — деп маалымдады.
Ымыркайдын денеси окуянын себептерин аныктоо максатында республикалык соттук-медициналык экспертиза борборуна жөнөтүлдү.
