БИШКЕК, 6-мар. — Sputnik. Кыргыз-орус өнүктүрүү фонду чакан жана орто бизнести колдоо максатында жалпы жонунан 2 миллиард 250 миң сом бөлгөнүн аталган мекеме билдирди.
Маалыматка ылайык, фонд кечээ, 5-март күнү "Айыл Банк" жана "РСК Банкка" 700 миллион сом өлчөмүндө кошумча акча бөлүп берди. Ал эми февраль айынын башында үчүнчү өнөктөш болгон "Кыргыз инвестициялык-насыя банкына" 350 миллион сом берген.
Буга чейин эки мамлекеттик банк 1,2 миллиард сомду өздөштүргөнү белгилүү. Ошону менен ишкерлерге насыя берүү үчүн 2,2 миллиард сом бөлүнүп берилген.
Насыя ишкерлерге сом менен беш жылдык мөөнөткө 12 пайыздык үстөк менен берилүүдө.
Кыргыз-орус өнүктүрүү фондусунун чакан жана орто бизнести колдоо программасы айыл чарба жана өнөр жай комплексине, тигүү, текстиль жана кайра иштетүү тармагына басым жасайт.
