БИШКЕК, 5-мар. — Sputnik. II Дүйнөлүк көчмөндөр оюндарына АКШ менен Австралиянын түпкү жашоочулары чакырыла турганын Мамлекеттик жаштар иши, дене тарбия жана спорт агенттигинин директору Шейшенкул Бакиров маалымат жыйында билдирди.
Жума күнү түрк тилдүү мамлекеттердин кызматташуу Кеңешине мүчө болгон төрт өлкө (Кыргызстан, Азербайжан, Казакстан, Түркия) Стамбулда оюндардын регламентин бекитти. Ага ылайык, Көчмөндөр оюндары үстүбүздөгү жылдын 3-8-сентябрь күндөрү өтөт. Анын программасына улуттук спорттун 26 түрү киргизилген.
"40ка жакын мамлекетти чакырууну көздөп жатабыз. Азырынча регламент бекиткен төрт өлкө гана келе турганын ырастады. Алыскы чет өлкөдөн АКШ менен Австралияны чакыруу оюбузда бар, анткени бул аймактын түпкү эли көчмөн турмушта жашап, спорт оюндары биздикине окшош келет. Мисалы, АКШ күрөш, жаа атуу боюнча ат салыша алат", — деди Бакиров.
Спорттун улуттук түрү боюнча дирекциянын башчысы Алмазбек Касенов жакын арада чакыруулар таратыла баштай турганын белгиледи. 7-июнга чейин катышууну каалагандар алдын ала макулдугун берип, ал эми оюнга бир ай калганда аяккы чечими тууралуу маалымдар кылышы керек.
