БИШКЕК, 3-мар. — Sputnik. Ысык-Ата районунда таксист өзүнө кол салган жүргүнчүлөргө каршылык көрсөткөнүн Чүй ИИББдин маалымат кызматы билдирди.
Ага ылайык, "Антибиотик" дачасынын 27 жаштагы тургуну милицияга кайрылып, эки жүргүнчү ага түшүп, жолдон муунтууга аракет кылганын айткан.
Таксист 2-мартта кечки саат 7.00дөр чамасында Бишкек шаарынын Кустанай жана Дэн-Сяопин көчөлөрүнүн кесилишинен ага европа улутундагы эки киши келип, Военно-Антоновка айылына жеткирип коюуну суранганын айтып берген.
Арткы орунга отурган киши аны муунтууга даярданып жатканын байкап, таксист машинаны жолдун четине дароо токтотуп, каршылык көрсөткөн.
Арткы орунда отурган жүргүнчү убакыттан пайдаланып изин жашырып кеткен. Бирок, таксист жанында отурган кишини кармап, милицияга кабар берген.
Тергөө учурунда кармалган жаран 29 жаштагы Военно-Антоновка айылынын тургуну экени аныкталган.
Аталган факты боюнча Кылмыш жаза кодексинин 168-беренеси ("Каракчылык") боюнча кылмыш иши козголуп, экинчи шектүү жаранды издөө иштери жүрүүдө.
