БИШКЕК, 4-фев. — Sputnik. Бишкекте такси айдоочусун муунтуп, тоноп кеткендер кармалганын Бишкек ШИИБ билдирди.
Маалыматка ылайык, үстүбүздөгү жылдын 10-январь түнү Жибек Жолу проспектиси менен Ростовская көчөсүнүн кесилишинде 30 жаштагы такси айдоочусуна эки белгисиз жаран кол салып, эки телефонун жана 600 сом акчасын алып кеткен.
Кол салгандар 20-25 жаштагы азиат улутундагы адамдар экени белгилүү болду. Бирөөсү айдоочуну көздөй газ баллонун иштетсе, экинчиси муунтууга аракет кылган.
Бул факты боюнча кылмыш иши козголуп, иликтөөнүн натыйжасында Бишкек шаарынын 22 жаштагы Тынарбек аттуу тургуну кармалган. Учурда анын өнөктөшүн кармоо боюнча чаралар көрүлүүдө. Тергөө иштери улантылып жатат.
