Атамбаев: желек —жарандарды боордош, келечекке сапарлаш экенин туюндурган кудурет-күч

Жазылуу
Өлкө башчы чейрек кылым мурда эгемендикке ээ болгон Кыргызстан соңку кезде өз жолун таап, ар бир жаран өз мамлекети үчүн жоопкерчилик анын да мойнунда экенин сезип жатканын белгиледи.

БИШКЕК, 3-мар. — Sputnik. Желек — Кыргызстанды мекендеген жарандарды боордош, жердеш, тагдырлаш жана келечекке сапарлаш экенин туюндурган кудурет-күч. Бул тууралуу президент Алмазбек Атамбаев Желек күнүнө карата кайрылуусунда билдирди.

Анын айтымында, Мамлекеттик желек күнү — элдин өткөн тарыхынын, бүгүнкүсүнүн жана келечегинин символу, улут рухун чагылдырып, баарыбызды мекенчил сезимге бөлөгөн сейрек, касиеттүү күндөрдүн бири.

"Желегибизди ар дайым кастарлап, сый-урмат көрсөтүү аркылуу биз өз тарыхыбызды, ата-бабалар мурасын, көөнө маданиятыбыз менен салттарыбызды даңазалайбыз. Биздин эркин жана эгемен мамлекетибиздин желеги — тынчтык менен ынтымактын уюткусу, Кыргызстанды мекендеген бардык жарандарды боордош, жердеш, тагдырлаш жана келечекке сапарлаш экенин туюндурган кудурет-күч", — деп айтылат кайрылууда.

Президент чейрек кылым мурда эгемендикке ээ болгон Кыргызстан соңку кезде өз жолун таап, ар бир жаран өз мамлекети үчүн жоопкерчилик анын да мойнунда экенин сезип жатканын белгилейт.

"Быйылкы Тарых жана маданият жылында Кыргызстан эли мамлекеттүүлүгүн дагы бекемдеп, ынтымак-ырашкерлигин дагы арттырат деп ишенем. Кийинки кезде ар кандай ири салтанаттар менен иш чараларда биздин желегибиз улам көкөлөп көтөрүлгөн сайын ар бирибиздин жүрөгүбүз сыймыктануу сезимине бөлөнчү болду. Бул улуу күнү бири-бирибизге, Мекенибизге асыл тилектерди жолдойлу", — дейт өлкө башчы. 

Атамбаев кыргызстандыктарга чың ден соолук, ачык асман, бакубатчылык каалап, Кыргызстандын келечеги кең, желеги Ала-Тоонун аппак чокулары менен теңдеш желбирей берүүсүнө тилектеш экенин белгиледи.

Жаңылыктар түрмөгү
0