БИШКЕК, 17-фев. — Sputnik. Футзал боюнча Азия биринчилигинин чейрек финалдык оюнунда Иран курама командасы менен кыргызстандык оюнчулардын ортосундагы беттеш катуу болот. Бул туурасында Иран командасынын машыктыруучусу Мохаммад Наземалшарий айтканын Тasnim News маалымат сайты жазып чыкты.
Футзал боюнча Азия биринчилигинин чейрек финалы Ташкент шаарында бүгүн болот.
"Эки өлкө ортосундагы футболдук беттеш бүйүр кызытаары бышык. Анткени командалар бул оюнга дыкат даярдык көрүштү. Кыргызстандык оюнчулар топ менен мыкты ойноп, коргонуусу жакшы. Биз баарына даяр турушубуз керек", — дейт Наземалшарий.
Иран курама командасы Азиянын он жолку чемпиону жана үч жолу коло медалга татыган. Кыргызстан 2005-жылы футзал боюнча Азия биринчилигинде коло медал тагынган.
Кийинки чейрек финалда Өзбекстан командасы Иракка каршы ойносо, Таиланд менен Австралия, япондор менен вьетнамдыктар кезигет.
Мелдештеги алдыңкы беш команда 2016-жылы Колумбияда өтүүчү футзал боюнча дүйнө биринчилигине жолдомо алат.
