БИШКЕК, 17-фев. — Sputnik. Бишкек аймактык шайлоо комиссиясы өзүнүн кадрдык резервин толуктап жаткандыгын шаардык кеңештин маалымат кызматы билдирди.
Бишкек аймактык шайлоо комиссиясынын курамы 2014-жылы 4-мартта бекитилген.
"БШК жарандарга жана саясий партиялардын өкүлдөрүнө кайрылуу жөнөткөн. Анда Бишкек аймактык шайлоо комиссиясы кадрларын толуктап жана документтерди кабыл алып жатат", — деп билдирүүдө жазылган.
Документтерди кабыл алуу 4-февралда башталган, ал 25-февралда аяктайт. Талапкерлер тийиштүү кагаздарды — арыз, паспорттун көчүрмөсү, жеке кагазы, резюме жана байланыш телефондорун тапшырышы керек.
