Бул маданий иш-чара улуттар арасындагы биримдик жана достук мамилелерди чыңдоо максатында өткөрүлүп келет. Ага Кыргызстандын атынан "Себат" билим берүү мекемесинин Жалал-Абаддагы Курманбек баатыр атындагы кыргыз-түрк лицейинин 11-классынын окуучусу Айтмат Эркинбек уулу катышып, "Ой тобо" элдик ырын аткарды. Ырдын автору Эсеналы Кушчиев.
Айтмат Эркинбек уулунун айтымында, тил жана маданият фестивалына 28 мамлекеттин өкүлдөрү катышкан.
"Алардын баары менен таанышып, достоштум. Анан калса мен тропикалык мамлекетке биринчи жолу барып жаткандыктан баары кызыктуу болду. Шаарда бийик имараттар көп экен", — дейт ал.
Эркинбек уулунун айтымында, жергиликтүү тамак-ашка көнүү кыйыныраак экен. Ал жакта нанды дээрлик жешпей, анын ордуна сууга бышкан күрүчтү колдонушканын жана тамактары ачуу келерин айтты.
Эл аралык тил жана маданият фестивалы жыл сайын түрдүү мамлекеттерде өтүп келет. Былтыр Кыргызстанда биринчи жолу өткөрүлгөн. Быйыл да жаз айларында уюштуруу пландалууда.
