БИШКЕК, 16-фев. — Sputnik. Кыргызстандык Эсен Калиев пауэрлифтинг боюнча мүмкүнчүлүгү чектелгендер арасында өтүп жаткан дүйнө биринчилигинде алтын медаль утуп алганы мелдештин расмий сайтында жарыяланды.
Пара олимпиадачылар арасындагы мелдеш 2016-жылдын 13-февралында башталып, Дубай шаарында өтүүдө.
Мекендешибиз 54 килограммдык салмакта катышып, 150 килограммдык штанганы көтөрүү менен алтынды багынтты. Экинчи орунду алган Сергей Халинский 142 килограмм, үчүнчүнү алган Япондук Тецио Нишизаки 128 килограмм көтөргөн.
Кыргызстандын намысын мындан сырткары Жыргалбек Орозбаев 107 килограмм салмак категориясында коргойт. Ал 19-февралда чыгат.
20-февралга чейин улануучу мелдеште 40 өлкөдөн 200гө чукул спортсмендер күч сынашат.
