БИШКЕК, 15-фев. — Sputnik. Ондон ашык окуучу кыз баскетбол боюнча мелдеште алардын "айласын кетирип, упай алган" кызды сабашкан. Бул тууралуу жабыр тарткан Канайым аттуу кыз Sputnik Кыргызстан маалымат агенттигине өзү билдирди.
Аталган окуя 10-февралда болгон. Канайым мектептин командасы менен биргеликте Чүй облусунун Кайыңды айылына баскетбол боюнча мелдешке келген.
"Биздин команда экинчи орунду ээледи. Оюн бүткөн соң кийим алмаштыруучу жайга биздин артыбыздан киришти. Чачымдан кармап, баарылап тепкилеп киришти. Жерге жыгылып, эсимди жоготуптурмун", — дейт Канайым.
Учурда ал Улуттук госпиталдын нейротравматология бөлүмүндө дарыланууда. Азырынча баса албайт, башы менен аркасы такай ооруп жатканын айтат. Дарыгерлер дагы так диагнозду коё элек. Себеби ал ооруканага рентгенге тартыла элекке чейин жаткырылган.
Канайымды камкордукка алган жакындары арыз жазууга каршы. Себеби, кызды сабады деп шектелгендер аларга тууган болуп калышы ыктымал.
Бишкек ШИИБден билдиришкендей, арыз келип түшпөсө дагы аталган факты боюнча кылмыш иши козголушу мүмкүн.
