БИШКЕК, 13-фев. — Sputnik. Бишкектин жаңы мэрин шайлоо процедурасы жана талапкерлер тууралуу маалымат менен Sputnik Кыргызстан даярдаган материалдан таанышсаңыз болот.
Шейшемби күнү Кубанычбек Кулматов ээлеген кызматынан кетип, анын милдетин учурда Айгүл Рыскулова аткарып жатат.
Шайлоо кантип жана качан өтөт?
Шаардык кеңештин депутаты Валентина Лисниченконун айтымында, бардык талапкер өз программасын төрт фракциянын жыйынында жана шаар парламентинин комиссиясына сунушташы керек.
БШКнын маалыматы боюнча талапкер жогорку билимдүү, жетекчилик жумушта беш жылдан кем эмес иш стажысы болушу шарт. Мындан тышкары, сот жообуна тартылбаган адам болушу кажет.
Талапкерлерди КСДП, "Республика — Ата-Журт", "Ата Мекен", "Замандаш" фракциялары жана премьер-министр өзү да сунуштай алат. Башкача айтканда, талапкердин саны беш кишиден ашпашы керек.
"Республика — Ата-Журт" оппозициялык фракциянын депутаты Докеновдун айтымында, мэрдин дайындалышы бийликтин тандоосунан көз каранды. Ал эми шаар депутаттары кимди көрсөтсө ошону бекитип беришет. Мында бийлик бир нече критерийге таянат.
"Биринчиден, талапкердин кайсы партиядан экенине басым жасалат. Экинчиден, ноябрда өтүүчү шаардык кеңештин шайлоосу да бар. Мында анын жыйынтыгын жакшы чыгара турган мэр керек болот. Анын кесипкөйлүгү үчүнчү орунда гана каралат", — деди депутат.
Докенов шайлоо жабык өтүп, ага болжол менен 30 киши катышарын, 23төн кем эмес добушка ээ болгон талапкер мэр болуп шайланарын белгиледи.
Талапкерлер тизмеси
Өкмөттүн маалымат кызматы премьер-министр азырынча бул маселени карай электигин билдирди.
Шаардык кеңештин депутаттары бир нече адамдын талапкерлиги каралып жатканын айтышууда. Алардын бири — шаар парламентинин мурунку төрагасы, учурдагы ЖК депутаты Марат Аманкулов. Экинчиси — "Манас" Эл аралык аэропортунун башчысы Албек Ибраимов.
Саясат таануучу Марат Казакбаев реалдуу талапкер катары Марат Аманкулов менен Айгүл Рыскулованы көрө турганын билдирди.
"Булардан тышкары Ибраимовду да түртүп жатышат", — дейт эксперт.
Марат Аманкулов ага азырынча эч кандай сунуш түшө электигин белгилеп, эгер түшүп калса макул болор-болбосун так айткан жок.
"Мен командада иштеп көнгөн адаммын. Эгер шаардык фракция айтса, аткарам", — деди Аманкулов.
Албек Ибраимов менен азырынча байланышууга мүмкүн болгон жок.
