БИШКЕК, 11-фев. — Sputnik. Москвадагы өрттөн каза болгон төрт жарандын сөөгүн Кыргызстанга бүгүн жөнөтүлө турганын Тышкы иштер министрлиги билдирди.
Эскерте кетсек, үстүбүздөгү жылдын 30-январында Москванын Стромынка көчөсүндөгү өнөр жай имараттарынын биринен өрт чыгып, 3 миң чарчы метри күйүп кеткен. Натыйжада имараттын чатыры кулап, 12 адам каза тапкан. Анын сегизи Кыргызстандын жараны, экөө — Россиянын жарандыгын алган кыргыздар жана өзбекстандык эки жаран экендиги белгилүү болгон.
Бүгүн эртең менен алты кыргызстандыктын сөөгү Ош аэропортуна келип, андан ары Баткен облусуна жеткирилген.
Сөөктөрдү алып келүү, маркумдардын туугандарынын жол киресин мамлекет моюндады. Министрлик ушуну менен өрттөн каза болгондордун сөөгүн мекенине жөнөтүү процесси соңуна чыкканын кабарлайт.
