БИШКЕК, 11-фев. — Sputnik. Быйыл Кыргызстандын жер-жерине 1000ден ашуун күнөскана курула турганын өкмөт башчы Темир Сариев парламенттин жыйынында билдирди.
Анын айтымында, былтыркы жылы курулган 742 күнөскана 160 гектар аянтты ээлөөдө.
"Дыйкандар тапкан киреше да өсүүдө. Мисалы, Кара-Суу районунундагы 1 гектар теплицадан 5 миллион сомго чейин киреше алынып, анын 2,2 миллиону чыгым катары саналса, калганы таза кирешени түзүүдө. Азыр күнөсканаларда көчөттөр да отургузулуп, сатылып жатат", — деди премьер-министр.
Сариев айыл чарбасында прогрессивдүү технологиялардын негизинде 4 модель — күнөсканаларды куруу, мал союучу пункт менен логистикалык борборлорду ачуу жана тамчылатып сугарууну өндүрүшкө киргизүү долбоорлору иштелип чыкканын белгиледи.
Ага ылайык, күнөсканалар менен бирге мал союучу пункттардын санын 10 жеткирилип, үч ири логистикалык борбор куруу жана 1030 гектарга жайылтуу милдети коюлганы белгилүү болду.
